港股愈跌愈急，跌到出股災，恒指低開245點，開始時還反彈上12,737點，其後不斷急插，下午跌至慘不忍睹的水平，曾下跌至10,676點，高低差幅2,051點，收市叫做彈番少少，收11,015點，跌1,602點，跌幅高達12.7%。期指收報11,148點，跌1,352點，比現貨高水133點，成交133,426張。國企指數跌812點或14%，收報4,990點，大市成交568億元。

身撈貨日日輸 

個市愈跌愈急，昨日又跌1,600點，在12,000點跌1,600點，和在32,000點跌1,600點完全唔同，在32,000點跌咁多只係5%，但昨日跌同一個點數跌幅卻高達12%，一日跌咁多，彈又彈唔起，跌勢真係嚇人。好似隻控（005），昨日又跌13元，跌到75元，跌幅14.8%，呢個又正好係大摩早前唱淡控的目標價，豐都咁跌，你話死唔死。  中環茶友話，早一兩個星期身撈貨者全線死亡，大市跌勢非一般，而且一直跌唔識彈，將一筆又一筆的資金吸入黑洞。表面上看信貸市場好似鬆，倫敦銀行同業三個月美元的拆息由4.8厘減到3.5厘，但銀行業人士話，其實這只是表面現象，實際上市場的借貸成交極少，即係有價無市，現實上資金仍極緊張，試想在資金緊張的情況下，銀行自然也不願借錢出街，所以信貸極緊，水緊股市無運行。 

你睇控都咁跌法，就知沽盤根本不問價沽貨，只求套現，我唔係話控好抵，只係話一日跌近15%咁多好誇張。中環茶友話，環球股市愈跌，各式各樣基金都要沽貨套現，很多地方股市流動性不如香港，所以香港沽得特別厲害，錢係咁不問價沽。

香港貨幣被聯繫匯率套死，難有獨立貨幣政策，又唔可以隨意發鈔，所以救市工具有限，你睇南韓昨日減息0.75厘救市，股市都升番0.8%，香港就無乜招可救。  依家股市跌跌，好多股票都跌都變晒形，有些已經回到2003年的沙士價，但我就唔敢叫大家放膽執，倒過頭來說，過去幾天，邊個敢沽，每天都賺錢，即係話執貨者日日輸。

  控主席特別顧問兼世銀前總經濟師斯特恩預期，歐美經濟於未來兩至三年仍會處於困難時期，料各國政府除注資銀行，令銀根放鬆，並會同時採用加大基建以刺激經濟。  好多朋友喜歡控來長，但如果專家話歐美經濟未來兩三年都困難，控在歐美有大量業務，即係話未來一兩年仍然唔係咁好景，控而家市盈率5.8倍，息率9.6厘，如果佢維持到盈利和派息，呢個價當然可以闔埋眼買，問題係佢多數維持唔到，所以唔好當有9.6厘息派咁買控。 

任總口術難有大效  另一隻巨股中移動亦跌到變形，昨日跌6.4%，跌到53.8元。摩根大通發表報告，認為中移動現價已充份反映下調估值因素，調高中移動投資評級由「減持」升至「中性」， 維持目標價75港元，預期09年市盈率7.9倍及年息率接近6%。另外，摩根大通表示聯通（762）合併後有50%為非增長性的固網業務， 兼且估值昂貴，09年市盈率16倍，將投資評級，由「中性」降至「減持」。

中電信（728） 則維持「中性」的投資評級。聯通及中電信分別急挫10.3%和14.2%，中移動可能因為評級較佳，所以跌6.4%已經算少。 油股和礦物資源股亦是跌市重災區，雖然產油國達成減產協議，但支持油價成效不大，市場預期油價會跌至每桶50美元，不過石油、石化股都唔理油價，上中下游股份都勁跌，中石油（857）、中石化（386）、中海油（883）分別急挫15%、16.4%和13%，最受油價影響的中海油反而跌得最少。中鋁（2600）仍續下瀉12.5%；謠傳神華（1088）有機會和中煤合併，但成為超級煤企，但消息對神華毫無助益，股價插水23.5%！ 


金管局任總昨日話銀行為防要為雷曼迷債撥備，收緊信貸，呼籲銀行不要「落雨收遮」， 以一刀切方式拒絕企業借貸，希望銀行能抱同舟共濟的精神，攜手共渡難關。任總咁講唔知有無銀行配合，你睇歐美亞洲各國出咁大力去銀行體系放水都唔掂，都唔係任總可以講得掂，阿爺出手放水或者就有效果啦。

陸羽仁