這是一個環球性跌市，恒指上周五以全日低位12,618收市，大跌1,142點；重磅股控（005）失守百元大關，被大摩調低目標價至75元，跌至88元，單日急跌12.5%，只是豐已令恒指大跌321點。
美股杜指跌337點，跌幅3.9%，收報8353點，在這種環球跌市中，美股呢個跌幅已經算跌得少了。在全球信貸非槓桿化的過程中，金錢急速蒸發，除了對沖基金為應付贖回大量沽貨外，愈跌就愈多斬倉盤湧現。正如經紀張所講，而家最惡就係「孖展哥」，你借錢買股，被經紀行call孖展補唔到，就要斬倉，這些不問價的沽盤亦加深跌勢。
除了股市外，商品市場和匯市亦大亂，油價上周五急跌5.4%，跌到64.15美元一桶，即使石油出口國組織決定每日減產150萬桶，亦阻唔到油價的跌勢。
日圓兌美元因為對沖基金套息交易盤平倉而大升，升上13年的高位，上個星期兌美元升了8.6%，兌歐羅升了13%，咁升法又迫使對沖基金進一步平倉，沽出以前借日圓買落的高息貨幣或資產。但美元除了兌日圓外，兌其他主要貨幣十分強勁，上周兌歐羅升了5.1%。英鎊上周五日中交易時，兌美元最多跌過5.9%，跌穿1.53，英鎊日中交易跌幅多過1992年被索羅斯狙擊的黑色星期三的跌幅。
短線非常非常便宜
前大摩全球策略師、對沖基金Traxis合夥人碧斯話，現時股市投資者極度悲觀，近乎絕望，美股正處於非常、非常便宜的水平，但碧斯亦未敢叫人入市買美股。 睇番港股，控上周五急插12%，穿埋90元，控跌到這個股價，好多散戶覺得十分抵買，會飛身撲入去，覺得跌無可跌。
講到「跌無可跌」，我又記起一件事，上周四出外公幹，早一晚美股大跌，當日早上係人都估港股要插穿14,000點大關，我在機場排隊時前面有個師奶股神，上機前大大聲向經紀落盤，話14,000點係「跌無可跌」的價位，叫個經紀一開市就幫佢身買10張期指。
呢句「跌無可跌」，真係似曾相識，早兩個月都有人話21,000點係「跌無可跌」，結果大市就從那個「跌無可跌」的水平再跌了8000幾點，邊有乜位叫做跌無可跌呢？聽到個師奶股神咁大聲話要買期指，我的心涼了半截，心諗呢位師奶咁搏命身做乜？
老老實實，陸羽仁近期都算係「淡怪」，睇得好淡，前一排身邊的朋友個個都問我點解睇得咁淡，因為聽到我成日叫佢地唔好入市接刀，話認為大市未跌完。雖然陸羽仁咁講，但起初我都只係覺得大市跌到14,000點、15,000點都應該差唔多，跌到咁上下應該來一浪反彈，捱番一頭半個月先至再跌過。不過大市穿15,000點之後彈都唔彈，直插而下，雖然不是一日跌3,000點、4,000點的股災式急跌，但幾日加埋都差唔多啦，而且反彈乏力，真係「淡怪」都估唔到咁淡。
百年一遇 極之無譜
我又經常講，今次金融海嘯是百年不遇的風暴，既然我地大家都無一百歲，所以都無遇過咁樣的風暴，大家都係靠估，無乜經驗。依家美國聯儲局主席伯南克，佢都叫做研究1929年美國大蕭條的專家啦，寫過一篇叫《論大蕭條》的論文（Essays on the Great Depression）。1929年同樣因為華爾街銀行家的無窮貪念，炒到爆煲，令股市暴跌，初時美國政府無出手救市，要到1930年代初羅斯福總統上台，實行新政，政府大力入市包底，才令美國經濟慢慢康復，就是1933年通過的《銀行法》創立了聯邦銀行存款保險制度，又在1930年代末成立了按揭證券公司房利美，由政府支持下重新搞活房屋按揭市場。
伯南克在論文中講過，「正是由於新政在1933年至1935年間使得金融系統恢復正常，美國經濟才從大蕭條中緩緩崛起。」 造好造淡 都會出錯 雖然伯南克已經係專家，但都係紙上談兵，他認為如果美國政府在1929年早早就大力干預市場，放水救市，出面包底，唔俾大量銀行倒閉，美國就唔會蕭條咁耐，但這種推論亦只係一種假設，依家伯南克就在實踐緊這一套「干預論」，不過實際上能否救得起美國經濟免於蕭條，真係要試過至知。既然我話聯儲局主席都係估估，所以聽到有人話個市「一定會點」時，唯一可以話「一定」之事，就係佢一定係靠估。
你呢一刻入市，無論造好或造淡，都有一套理論，造好者，話個市跌咁多，無理由再跌，就算未見底，都一定（又係一定）會彈。我唱反彈，個市係一定會彈，但係今日彈，同一星期後彈好唔同，今日彈番2,000點、3,000點可以上番15,000點，過一星期佢跌到10,000點邊先至彈，可能只係彈番上13,000點，即係差不多你入市個位，跟住又可以再跌。記唔記得我講過，20樓跌落來可以跌死人，5樓跌落來都可以跌死人，就係講呢種風險。
反過來說，你又可以造淡，話個市跌開有個勢，可以一直跌穿10,000點大關，所以可以買熊仔沽空。我又唱反調，個市由上浪反彈高位17,100點跌落來，跌差唔多5,000點，短期仲可以跌多幾多？你一沽佢就彈，你就中伏啦。 老實講，我就唔識估，只識教大家控制風險。當一切都可能出錯時，咪再講「一定會彈」、「跌無可跌」之類廢話，世事無絕對，要先假設自己會錯，要想如果出錯時，後果自己承唔承受得起。
先講「投資的我」，雖然我本來估計今浪跌完明年會再跌，但如果恒指愈跌愈低，個別好股亦跌到變晒形時，又怎能否定股票已經進入好抵買的水平呢？如果你好似股神巴菲特咁，識得計公司未來十年的現金流，計到公司的內在價值，公司股價一低過內在價值好多時，自然可以身入市。但我估99%的讀者唔識計內在價值，另外1%讀者雖然識計，但都要明白計公司未來的現金流有好多假設，雷曼都會執笠，這些假設又會唔會錯呢？邊個可以話俾我聽，那家公司100%不會執笠呢？你點知佢有無暗中買「迷暈債券」，或者買「累死你票據」，可以一夜之間輸晒間公司呢？
既然幾穩陣的公司的前景都有不確定性，若要買作長線投資，就要先作心理準備。第一，準備個市有排都未跌完，呢浪大插完又反彈，但上升並不等如見底，明年又可能再大插，甚至最壞情況搞你一兩年（我都唔敢講三、五年啦），要有長期作戰的準備。既然有可能係咁，想買都只能分段買，買住一先，唔好身，唔係小心變成低。
唔會發達 唔使跳樓
第二，準備任何公司都可能出事，所以唔好買死一隻，例如控，唔好覺得佢好抵，佢有三隻腳，美國、歐洲、香港，美國隻腳先跛了，因為撇帳撇得早，股價一度幾穩，但而家風暴燒到歐洲，燒到香港，難保明年又要為歐洲大撇帳（香港好少少，因為歐洲銀行業透明度低，埋藏炸彈較多）。要買股都唔使買死一隻控，分散，安全。你買五隻股票，死一隻，仲有其他頂一頂。
第三，唔好鬥氣頂頸。買錯，買錯股，買錯方向，若是炒作，要馬上止蝕，唔好以為坐坐可以坐番來，過去得的方法，依家未必得。過去二十年的熊市同呢次比，只是濕濕碎，呢次係從美國金融業的核心開始融解，救唔救得到都未知，所以不但是熊市，是狂熊市，暴跌狂彈，不受控制。若炒作時睇錯堅持死坐，好易愈坐愈深，不能自拔，投機變投資。呢市如果投機唔順手，最佳方法係停手一。
第四，要有永恒用的壓力測試，經常去諗如果買錯會點，無論做好或做淡，要經常評估假如做錯死唔死到人。你係多餘錢買股投資，唔怕坐十年，當然可以承受一點風險。但千祈唔好借錢買股，你以為大市已經見底，借到盡去買；又或者你以佢一定再大插，用明年娶老婆的老婆本身去沽，就要諗錯點算。借人錢，或者錢等住用，都不宜將之投入而家超高風險的股市。
最後總結一句，用晒我上面的方法，包保你唔會發達，但也應該唔使跳樓，又唔晒，錯又錯唔晒。遇到咁百年不遇的金融海嘯，都係保住條命、保住份工緊要啦！
陸羽仁
