港股昨可以用不忍卒睹四字來形容，美股上日因大公司業績倒退而回落200多點，恒指低開超過160點，初時跌得不算厲害，早段更曾向上衝逾280點，大市倒升120點，但觸及全日最高的15,161點後，掉頭回落，半日已急跌430點；下午開市，受日本股市狂瀉6.8%的影響，加上美股期指跌過百點，大市插水下墜至全日最低位14,038點，恒指跌超過1,000點，險守14,000點大關，尾市叫做反彈，反覆回升至14266點收市，跌775 點收場，跌幅5.2%，又創新低，已經是近期第三次穿低位。

期指低位更插穿14,000點，低見13,986點，最後收14,106點，下跌1064點，低水160點，國企指數收報6,700點，跌566點或7.8%，大市成交540億元。 

資金回流美國 

恒生指數成份股除港鐵（066）逆市微升1%以外，所有股份全部下跌。控（005）報103.8元，挫2.9%，已經唔叫做跌得多；中移動（941）繼昨天大跌5%後，今日再挫5.3%報63.95元。 

中環茶友話，雖然港股創了新低，但昨日都未算插得太狠，日股都跌631點，跌幅6.8%，港股的5.2%跌幅已好過日股，至少唔可以話有大戶大力隊低港股，因為要隊可以隊得更低。

經紀張話美股都仲有9000點，但港股卻要再創新低，個市無理由跌咁多。我就講，股市升跌都唔講理由，依家港股、甚至亞洲股明顯無水來買，跌市原因就係無水咁簡單。  你睇美國的宏觀情況並非咁壞，美國聯儲局話會協助貨幣市場基金，購買6,000億美元資產，消息令美元走強，反映美元兌6種主要貨幣的美元指數上日再創新高，美元只係兌無可能再減息的日圓較弱。

銀行同業市場的緊張情況亦進一步放鬆，三個月美元的倫敦銀行同業拆息（Libor）上日已回落到3.83%，係近期新低，信貸市場有進一步解凍的跡象。 

不過千萬不要以為美國市場回穩，就一定對亞洲有利，依家美元咁強，係一個側面反映資金正回流美國，除了話美國基金在海外出貨應付贖回之外，亦有人信美國有康復之象，所以把錢泊入美國。當水源從亞洲歐洲回流美國時，這些地方股市缺水，自然唔靚仔。  若果只睇圖表，港股走勢一浪低一浪，極不靚仔，除非有大戶想調轉頭玩，否則正路仍然係一級級咁落。 

中信通函手尾長 

跌得最甘仍然係市場焦點中信泰富（267），繼昨日大挫逾55%後跌幅停不了，開市插到5.6元，但後來一度反彈上6.3元，升番到接近上日收市的6.52元水平，但後來證監會聲明調查中信泰富，佢股價再急挫，最後收市再暴跌25%，收4.85元。中信泰富宣佈會出售旗下大昌行（1828）套現，受賣盤消息刺激，令股價急升，最後升幅收窄至48.3%，收1.29元，估唔到中信泰富中招，最後益了旗下大昌行的股東。

中信泰富累街坊的影響延續，瑞安房地產（272）中期報告曾披露一度持有交叉貨幣利率掉期合約，觸發市場的憂慮，股價再挫25.1%。 

中信泰富相當手尾長，依家又發現中信泰富管理層在9月7日發現事件，但公司在9月16日發的股東通函又話無導致公司重要虧損的事項要披露。

老老實實，如果在佢出通函之後買中信泰富股票的股東，就一定要向簽那份通函的中信管理層索償啦，主席榮太子個位都唔係咁易坐。 

昨日好多股份都大插，但建材及基建股又插得特別勁，中國經濟放緩，阿爺好可能要加強基建來頂住經濟，起鐵路係首選，所以早前鐵路建設股的股價都相對硬淨，無其他紅色股跌咁多，但昨日就傳最愛買這類股份的韓國資金撤退而突然急插，例如中鐵建（1186）就跌19%、中鐵（390）更跌21%，由於沽壓不低，加上兩隻股相對貴，小心還要再下滑。另外建材股中國建材（3323）插19%，安徽海螺（914）9個月多賺34%，但股價挫9%；中材（1893）亦跌6%、中交建（1800）跌6%。

陸羽仁

真系担心我阿妈顶唔顶得顺啊！！！甘升升降降