美股杜指上日大升413點，好友對港股充滿期望，但恒指開市已無乜力水，只是高開294點，升近2%，見15,617點後反覆回軟，下午轉為倒跌，低見14,884點，尾市略為反彈，重回15,000點關口，恒指收市報15,041點，跌282點，跌幅1.8%。期指收市報15,170點，下跌100點，高水129點。國企指數倒跌174點，收報7,267點。大市成交506億元。

市場焦點盡在昨日復牌的中信泰富 （267） ，因投資累收外匯票據（Accumulator）蝕155億，被外界狂質公司管理不善及拖延公佈等問題，在昨天早上未開市的競價時段，股價已跌一半穿7元，開市之後吸引一班撈底散戶入場，股價好快反彈至9元，只係跌38%，但這個出貨黃金機會一閃即逝，基金瘋狂出貨，股價跟反覆狂插至低位6.47元，最後以6.52元收市，大跌8元，跌幅達55%之巨，成交13.7億元，市值一夜間蒸發175億元。

同系大昌行（1828）亦受大股東中信泰富拖累，收市報0.87元，急挫20%。

芬佬買股窒一窒

昨日港股表現特弱，區內日股升3.3%，港股無得升不特止，跌幅亦比新加坡和內地股市多。表面看是受巨股中移動（941）影響，公佈首三季業績，成績令人失望，每戶收入和每戶通話時間同時減少，市場普遍看淡，股價受壓，收市報67.55元，下挫5%。單是中移動帶動港股唔見93點排第一，排第二的黑仔就係中信泰富，帶動港股唔見38點。

中環茶友個個都話中信泰富累街坊，因為整單咁杰撻撻大鑊出來，彭博通訊社都當作頭條新聞咁出，剛剛排在美股升400點的新聞之後，舉世聞名，芬佬本來對港股的購買欲已不強，而家再去買港股更怕俾客仔質詢，所以少買為妙，再等一會，所以搞到港股不升反跌成為冠軍。

經紀張媽聲四起，話政府逼他買強積金，他的強積金有買盈富基金（2800），中信泰富係藍籌股，即係唔覺意就做中信泰富間接股東，中信泰富賭外匯輸身家，他都間接唔見錢咁話。我就話有賭Accumulator的公司唔少，輸錢的應該很多，但要一輸輸半家公司去的確唔多，累埋有買盈富的市民輸錢，又的確抵鬧。陸羽仁早前講笑咁話怕有公司內有「金融三聚氰胺」，未跌得夠，但亦估唔到中信泰富可以輸咁多。 

好多朋友中信泰富，問我點算，我唔係好識答，跌咁多或者會彈，但由於他重他睇淡澳洲元的Accumulator，不斷要接澳紙，若澳紙大升，他會無事，實際上輸的錢遠比現時計的155億元少，但若果澳紙再跌得甘，佢仲大鑊，所以佢等如大賭澳紙，一隻藍籌股搞到咁田地，真係無眼睇。若果好怕風險，可能等他反彈時減持一部份，換入一些同樣跌得好甘的龍頭國企股穩陣。

  住中信等如炒澳紙  陸羽仁發覺自己撈唔掂轉行做分析員都得，早排我成日講本地銀行股唔掂，終於有證券行出報告唱淡，瑞信認為本地銀行存款增長不多、融資成本上升、以及手續費收入疲弱，將香港銀行明年盈利預測下調12%至32%，銀行股份備受沽壓。控（005）斥逾6億美元購印尼工商銀行，股價先升後跌0.09%；恒生（011）跌2.3%、東亞（023）挫2.4%，但渣打（2888） 及中銀香港（2388）則無升跌。

能源股表現較好，瑞信發表報告，話神華（1088）涉現貨及出口煤市場較少，對現貨煤價不明朗的敏感度較低，具防守性，將評級由「中性」升至「跑贏大市」，但目標價由35元下調至25元，加上公佈業績勝過預期的消息刺激，神華收市報15.8元，上升5.3%，整個能源類股份亦因神華上升受，跑贏大市。

陸羽仁