港股連創新低後終於反彈，恒指高開138點後，反覆造好，內地提前公佈經濟數字，增長和通脹齊齊放慢，令人憧憬內地進一步救市措施快將出籠，加上美股期貨又造好，刺激港股反彈，升幅不斷擴大，下午初段港股升幅加闊，一度升上最高的15,473點，隨後升幅收窄，尾市又上，恒指收市報15,323點，大漲769點，或5.3%，收復上周五創新低的跌幅。期指收報15,270點，升800點，比現貨低水53點， 國企指數走勢與恒指類若，收市報7441點，反彈434點，或6.2%，升幅更勝恒指。

內地公佈的經濟數字相當疲弱，國家統計局公佈中國今年前三季度內地生產總值（GDP）同比增長了9.9%，比上年同期回落2.3個百分點。如果單計第三季GDP只有9%，比今年第二季度的10.1%顯著回落，是2003年第二季度即沙士以來的最低增幅。通脹率同時放緩，9月份CPI（消費物價指數）同比上漲4.6%，比上月的4.9%，回落0.3個百分點，這是今年以來連續第5個月回落。

內地經濟咁顯著放緩，令到阿爺可以全面放鬆宏調，改為放水挺經濟就啦，所以內地股市睇到數據咁差亦轉跌為升，上證綜指最後收滬綜指最終報收1,974點，升2.3%。 

數據愈差愈會救 

外圍亦繼續反彈，明日下午時美股杜指期貨升200點以上。本地藍籌股昨日差不多全線向好，除了思捷（330）逆市下挫3.9%及中信泰富（267）停牌外，所有的藍籌股均有不錯的升幅。其中以中移動（941）最勁，大升7.6%，升到71.1元，單係一隻股已帶動恒指升131點。另外地產股的升勢最為凌厲，信和（083）升10.7%、和黃（013）升10%，而中國海外（688）更飆升12%。反而近日弱勢的控（005）就繼續慢慢行，收報107元，只升1.7%。

一舖輸半隻藍籌 

以行業計內房股彈得好勁，市場憧憬內地將有救市措施出籠，加上溫總理在國務院常務會議時強調「加大保障性住房建設規模，降低住房交易稅費，支援居民購房」，內房股普遍大幅反彈，碧桂園（2007）升20%後升幅收窄至10%；華潤置地（1109）升13%；世房（813）升11%，遠洋地產（3377）升12%。

講完股價升，都要講股價跌股，昨日停牌的中信泰富（267），今日復牌恐怕都有大災難，中信泰富昨日發出一個超級盈警，集團為了減低西澳洲鐵礦項目面對的貨幣風險，簽訂若干槓桿式外匯買賣合約而引致重大虧損，現時已知損失約8億元，但按合約集團須接貨之最高總金額為94.4億澳元及1.6億歐羅，按目前公平市價計，集團會蒙受147億元帳面虧損！  中信泰富停牌前收14.52元，市值318.4億，即係話潛在虧損係公司市值46%，賭一舖就輸半隻藍籌股。呢咁大風浪，一般公司頂唔順，因為債主見你輸咁多，馬上臨門追債，公司好易周轉不靈，但中信泰富好彩有阿媽照，母公司中信集團已安排一筆15億美元的備用信貸，畀中信泰富頂住檔先。 

就目前中信泰富公佈的情況，令佢輸得咁甘的主要是和澳元或歐羅掛的累匯票據（Accumulator），有同時掛兩隻，邊隻低接邊隻，部份年期長達三年。澳元從7月時的高位0.97美仙跌到現在的0.69美仙，唔見29%，中信泰富的主要合約的澳紙行價係0.87美仙，接貨價距離現價已輸11.5%，佢合約又巨年期又長，日日要接貨，過某一個價位又起碼打孖上，咁按市值計唔見147億都好正常啦。  你可以話，呢147億虧損只是按澳元現時匯價計公平市值計出來，若果將來澳元升番，中信泰富可能無輸咁多。但好口臭咁去講，衰開有條路，萬一澳紙兌美元再跌多兩三成，跌到澳紙利息減無可減先至停，中信泰富都大大鑊啦，依家爆到咁大，平倉又平唔到，中信泰富唯有硬食。 

Accumulator等衍生產品風險極大，但表面上睇又唔覺，結果令好多有錢人輸錢，很可能亦有好多上市公司輸錢，相信爆大鑊不止中信泰富一個，等出業績時還有得爆，呢炸彈真係嚇死人，所以未到明年睇埋公司業績，都唔好話邊隻股肯定無事。另外以後見到任何表面睇「好數」、「好高息」的投資產品，都係少掂為炒，光棍佬教仔，便宜莫貪呀！
陸羽仁