股上周五走勢認真肉酸，雖然當日在美股杜指大升401點下開場，但恒指上升乏力，下午反覆回落，在收市前競價時段更插水，以全日低位14,554點收市，跌676點，若以收市位計，已插穿10月10日收市的14796點收市低位，只差當日日中低位14,398點未破.

上周五美股大幅波動，上落28次，消費信心低落和差勁的房屋數據，蓋過股神巴菲特話現時可以入市的建議，最後美股杜指跌127點，跌幅1.4%，跌落8852點，算是急升之後的回吐。

巴菲特在《紐約時報》撰文話，現在買緊美股，他有一個簡單邏輯指導他買股，在別人貪婪時恐懼，在別人恐懼時貪婪，現時好肯定大部份人都極為恐懼，所以他入市。股神咁建議，信不信由你。

如果睇本地經濟，的確幾令人恐懼，依家最大鑊係本地銀行開始「落雨收遮」，急急收緊信貸。幾個在本地做生意的中環茶友不約而同咁話，最近銀行紛紛大幅加息，大有不想做生意的感覺。

茶友甲話，公司在十幾家銀行有備用信貸，過去每一兩個月總有些信貸額到期，銀行都會自動續期，但呢個月有信貸額到期後，銀行竟然要大幅加息100個點子（即1厘），由原先的息率香港銀行同業拆息加60點子，加到拆息加160點子，一下子加1厘，而且不止一間銀行係咁，幾個茶友夾料，發覺好幾間銀行都係咁，而且不但是細銀行，大銀行都一樣「落雨收遮」。

另一個茶友乙話，呢次銀行收緊信貸的情況，比98年金融風暴時厲害好多，當時公司有十幾條信貸額，結果當中有十間銀行離場不再借錢，那些多數係日本銀行，呢批銀行臨近97大舉進軍香港，一見金融風暴就馬上散檔，撤離香港，但當時其他借錢俾佢公司的大銀行郁都無郁，既無收回信貸額，亦無加息，所以今次大銀行的做法極不尋常。

大幅加息意圖趕客

我估大銀行咁樣加息法，其實係不想做生意的格局，想將街外借貸數字降低，就用加息來趕客，客戶唔鍾意就走，若果等錢使就唔該畀多利息。你可能馬上有一個問題，點解銀行要趕客呢？我估係同呢銀行的阿媽有關，香港大銀行的總部在歐洲，金融海嘯吹到歐洲，呢銀行在歐洲的總部可能都要大幅撇帳，撇帳後資本減少，就要有相應行動，銀行有1元資本，可以借10元出街，若銀行撇掉1元資本，就要減少10元借貸，以維持資本充足比率。所以阿媽要撇帳時，唔止阿媽自己，在香港個阿仔都要減少借錢出街，這就是信貸緊縮的過程。

大銀行一方面加貸款利息唔想做生意，另一方面亦有歐資大銀行直接在香港為阿媽吸存款，提出的息率比安信兄弟提出三個月大額定期的5厘息仲要高，可見歐洲大銀行其實仲係缺水，連存款都唔夠，由此可知英國首相白高敦出招後，英國銀行業仲未風平浪靜。

總而言之，銀行水緊，在現時信貸緊張的時候去收債，好似我班中環茶友的大公司就無乜問題，他們的公司大把水，見到銀行收債只係當睇戲咁睇，但試想如果係中小型公司，又或者借貸比率好高的大中型公司，銀行咁「收遮」，會唔會收到死人呢又？

近期已經有幾家公司頂唔順執，一間係經營成衣連鎖的U-Right佑威（0627）死亡在前，開玩具廠的合俊集團（2700）倒閉在後，上周五連老牌電器零售商泰林電器都死埋，它們的關鍵死因還有待查證，但銀行在這個緊張時刻收緊信貸，肯定也是這些公司死因之一。正因如此，你會發覺好多高投資、高借貸的工業股都被人沽到阿媽都唔認得，因為那些公司縱然本質不俗，但只要過度擴張，一遇到形勢逆轉，外頭生意放慢，本來已影響資金回籠，再加上貸款到期銀行又要收債，都會逼到企業幾頭痛。

高負債股 避之則吉

例如紙業股股王評級玖龍紙業（2689）就係一例，最近股價急跌，跌到咁上下評級機構標準普爾仲發表報告，將玖紙長期企業信貸評級的「BBB－-」級別，以及它一筆3億美元的高級無抵押票據發行的評級，列入負面觀察名單，即係話隨時會降級。另一評級機構惠譽亦將玖紙的3億美元票據降至「BB+」，這是垃圾級別的「非投資評級」。

標普的報告話，玖紙的資本開支高於預期，加上行業市況疲弱，降低盈利能力，有機會令負債上升。集團截至6月份，經營現金流對總負債比率由去年6月36%降至今年15%。負債對EBITDA（除稅項及折舊前現金收入）比率由2.4倍升至5.5倍，負債比率上升，信貸保障情況惡化，預計財政狀況在本年度持續緊張。

股神買股 預要守

在這種形勢下，玖紙的股價跌到無影，去年高位23.7元，近期反覆急插，跌到上周五收市的1.12元，連高位的零頭都無，但在這種惡劣的信貸環境中，高負債的公司大跌又好正常。 銀行呢種大力收緊信貸的行為，唔係一兩日就會完，佢會先收縮一「浸」，將總借貸規模收縮到和資本額相適應的地步，英國的銀行由於無必要都唔想畀英國政府入股，以免將來發花紅都被政府管到死，所以若資本減縮了，就情願縮借貸，做少生意捱過嚴冬。

向銀行借錢者，要求神拜佛望銀行這個縮資縮借貸的循環快完，講得衰，如果銀行一季一季咁輸錢，資本減完再減，佢借貸額可以縮完再縮，唔係三、五日就完，驚佢三、五個月都未完，所以企業吊頸唔止吊一次，要預備嚴冬可能較漫長。 近程講，面對咁信貸環境，本地公司會出現爆煲潮，睇股市都唔好睇得太好，好多時都係有反彈，無真升。雖然股神巴菲特話佢買緊，但按過去的往績，股神開始買，隨時買早半年，你若要入市，真係要好守得至好，而且心理質素要好，可以捱得佢再跌，其中一招就係預要守三、五年，要買都係逐少入市，因為股神話佢會愈跌愈買，你要跟佢，都唔好幾飛子彈一次過射清呀。

陸羽仁