港股連續兩日反彈後開始腳軟，恒指昨日跟美股少幅低開224點，報16609點，早段觀望曾特首《施政報告》有無料到，一度低見16270點，特首在11點開始講報告，股市略為反彈，半日收報16341點，跌491點；下午橫行至三時就開始插，跌幅逐步擴大至接近全日最低位收市，收報15,998點，大跌834點或5%，跌穿16,000點大關。期指收報15,940，跌1,139點，比現貨低水58點，成交87,341張。國企指數報7,894點，跌541點，全日成交522億港元。

中環茶友話，港府早一日全數擔保存款，但港股昨日開市唔升，形勢已經不妙，特首未讀《施政報告》，港股已跌過562點，獲利回吐味道好強，但好友仍在等《施政報告》有無利好經濟消息，後來特首讀報告講到不會賤價賣地，大市當時亦曾彈過100幾點，但利好經濟的消息唔夠多唔夠具體，特首只係話會設立一個特別委員會研討金融海嘯，比較空泛少少。

調整浪起先尋底 

茶友話，大市反彈了兩日，好友本來想等埋《施政報告》出，若有勁出場，就推住大市衝破前日高位17,141點都唔奇，但最後《施政報告》講經濟講得比較稀水，好友無乜藉口可炒，見到勢色不對，就馬上退場，呢一浪反彈宣佈壽終。下晝歐洲開市，歐洲佬沽埋一份，講幾講就跌穿埋16,000點，期指仲要跌1139點咁多，相信大市要先調整一下，回補番大反彈上升的裂口。 

大市彈得急，本應回得急亦好正常，不過無情情無重大壞消息咁快又回到穿埋16,000點大關，又快到少少出人意料，可見市底人心極弱，一唔對路馬上出貨，希望後市守得住15,000點，唔好又再試底。  市淡的時候乜消息都向壞的一方解讀，政府為所有存款包底，又被講成不利大型銀行，重磅股控（005）報111.7元，跌2.8%；渣打（2888）報171元，下跌1.7%；恒生（011）報114.2元，下滑3%；中銀香港（2388）報12.38元，下挫3.4%。照計不利大銀行應該有利中小型銀行，但佢地一樣跌，創興（1111）回吐5％、永亨（302）跌2%。

其實政府為所有存款包底，對大細銀行都係好消息，起碼短期內免去被擠提之憂，將其中一項重大風險因素剔除。從電視訪問存戶所見，好多猶有餘悸，話仍然會放錢在大銀行，所以話新政策是否對大銀行不利，真係要先睇存戶會唔會一窩蜂轉錢去大銀行。 

銀行股真正面對的問題，可能係生意會大幅收縮，但佢地具體受多大打擊，可能無咁易睇到，但金融海嘯對港交所（388）呢類股份的打擊就較易估到，佢主要靠大市成交和新上市公司的收益，港交所昨日跌4.6%，收88.25元，市盈率15.2倍，表面睇唔係好貴，但想深一層，佢舊年盈利62億，以呢個盈利計出15.2倍的市盈率，你估佢今年可唔可以保持去年32000點咁大牛市盈利呢？如果今年保持唔到去年盈利，明年又會唔會再跌呢？上市公司若盈利會持續下跌時，15倍的市盈率唔係貴，而係超貴，超貴的股票唔係一定唔會升，佢遲再反彈到16倍、17倍市盈率都得，但我奉勸大家千祈咪去買。

長周期股唔好掂 

依家驚完金融機構崩潰後，又開始驚經濟衰退，大家要知道有種股票叫周期股，它們的走勢和經濟周期特別密切，例如航運股，就係一種長周期股。摩根士丹利發表研究報告，調低2009至2010年內地集裝箱吞吐量增長預測4.8及1.1個百分點，同時調低及中遠太平洋（1199） 及招商局（144）該兩年盈利預測，兩股分別急跌8.2%及7.6%。 唔好以為航運股好快就渡過難關，佢會受到雙重打擊，因為佢地唔止受經濟周期影響，仲要受行業過度膨脹影響，過去兩年航運業太好景，運費大升，吸引船公司大量投資新船，未來是大量新船陸續下水高峰期，供應大增，生意大減，可以話出世遇饑荒，你都咪話唔大鑊。大家可能唔知，航運業遇到長周期逆轉時，船公司可能頂唔順，七十年代末、八十年代初航運業就爆出這種大鑊，船王包玉剛醒目收購九倉上岸做生意，另一個船王董浩雲走唔切，最後間公司要債務重組。  所以散戶見到呢長周期股要小心，最好唔好掂，唔係好易上身，有排都未見曙光。

陸羽仁