金融High Tea --- 油價狂炒 油股惡玩 23/5/2008
美股衝上萬三點後腳仔軟軟，兩日跌成四、五百點，在美股回軟下，恒指跟隨美股低開476點，低見24,700後反彈上25,058，收報25,043點，跌417點，算係企番穩兩萬五。國企指數跌313點，收報13,821點，大市成交811億元。期指彈收報24,958點，跌472點，比現貨低水85點，成交77,735張。
內地股市早盤受美股大跌及發改委否認油氣價格將放開的消息影響，大幅低開後滬指一度急跌；幸好午後中石油和中石化再度快速上升，最終滬綜指報收3,485點，跌1.7%，深成指報收12,366點，跌2.3%，兩市成交額共計1,424億元人民幣。
美股萬三關點都要跌
美股成為全球跌市震央，表面睇，華爾街這一輪拋風係因為油價不斷上升，令人擔心通脹上升，甚至出現滯脹，但中環茶友認為，深層的真正原因，又係大戶玩，皆因杜指升穿萬三點，已經同歷史高位相差無幾，標普指數仲創新高，若然繼續炒上，試問有幾多水位可以升呢？所以就算無油價飆升因素，相信美股一樣會借其他原因調整，不過，油價升勢如狼似虎，俾出市場拋售的理由充份，調整於是就勁。
講番油價，最近美國話減少購買儲備石油，但油價仍然係咁升，有熟悉美國政情的猛人話，最近國會吹風吹到四圍係，話布殊落台前，美國會同以色列聯手空襲伊朗，油價急升好大理由係炒呢個戰爭溢價，有人奇怪，如果要炸伊朗，點解要打開口牌，一個解釋係伊朗根本無能力反抗，就算話明要砌你，咁你又奈得我美國何咩？
有人認為呢個係殊仔落台前，再送一個大禮畀支持他的油商，政治呢樣，從來無所謂真相，因為就算任何事就算計劃好，都分分鐘會變，殊仔可能真係想打伊朗，但一日飛機未出動，一日個市都有得炒。
猛人話，油價因為中東因素不明朗，故此升個不停，但若然美國同以色列真係出手，空襲一打完，油價就有大跌可能。布殊臨落台前仲搞咁大動作，背後有兩個動機，從個人睇，自己任內打伊拉克未竟全功，留低一個大包袱不特止，下任總統上場仲可能撤兵，屆時呢場仗隨時爛尾，經濟上又整個次按風暴出，留係歷史上的成績認真麻麻。若然臨尾搞掂伊朗，都叫做番多少分，反正用飛機去炸伊朗，幾乎係有贏無輸，絕對制得過。
從美國立場，自從打伊拉克差錯腳，中東油國有跡象不再聽足美國支笛，發惡打伊朗有揚名立威的作用，向中東班油佬展示一下實力，讓呢班大帝明白美國手瓜仍然係好硬！係咁氣氛下，班油鱷炒起油價，自然係得心應手啦！
聽住猛人咁講，中環茶友話，早前有老友沽中石油（857） 換中海油（883）的古仔，睇番今個月中海油因為集中開採業務，股價大幅上升，早前的決定可以稱為完美的換馬行動，美中不足係沽得太快，手頭的中海油已沽三分之二，仲有三分一股份在手，現在就要睇住油價點走，決定是否賺埋錢，既然油價升得急，最好的方法係上移止賺位，以高位回落一成作為食胡價。
美夢成空 煉油股無運行 油價升，但油股其實都幾難炒，前日內地傳會開放油價，中石油、中石化股價一度急升，發改委否認國內成品油價格上調的傳言，油價一連四日創新高，石化股沽低大市，加價夢成空，中石化（386）跌愈3%，中石油也跌1.58%，中海油跌0.63%。獨係係中油香港（135） 一連兩日放量走高，升7%。中環茶友話，前日市場傳出話放寬油價，聽落都覺得可能性好微，內地通脹高居不下，中央連四川地震都未必會放鬆宏調，又點會開放油價不管呢？所以你話中央加多點補貼機會存在，開放油價真係聽落都好難入信。
中環茶友話，中央對於煉油公司受油價高企影響並非全無關注，但「管理層」亦都有個看法，認為無理由煉油公司遇到油價升就加價，把油價全部轉嫁消費者。至於航空股好似國泰（293） 亦跌2%、國航（753）跌3.8%、南航（1055） 、東航（670）都跌近5%。
陸羽仁
